Tripura : Doctor chil chhak khumtu mi pali police kutah inpe
Tripura-a Covid-19 kai enkawl an nih laia doctor pakhat hnial buai a, chil chhak khumtu mi palite chu High Court-in an interim bail a hnawlsak hnuah, Ningani khan police kutah an inpe.
Heng mi palite hi New Capital Complex police station-a officer in-charge hnenah an inpe a, West Tripura-a chief judicial magistrate court-ah hruai nghal an ni. July 24 khan West Tripura District Surveillance Officer Dr Sangita Chakraborty chu Covid-19 kai pali awmna, Bhagat Singh Youth Hostel-a Covid Care Centre-ah hian hmeichhe panga admit turin a kal a, an zingah hian naute pawh an tel. Mahse he hmuna awmte hian an awmna hi an khat tawh nia sawiin, mi thar dah luh tum chu an lo duh lo a, heng mi palite hian doctor hi lo hnial buaiin Dr Chakraborty chu chil te an chhak khum a, an hri kai pawh kai veah an lo vau a ni. He thil thleng vang hian Director of Heath Sevices chuan FIR an thehluh a ni.
Doctor chil chhak khumtu mi palite hi an quarantine hun a tawp hnuah man tura tih an ni. Thawhlehni khan judicial magistrate Sanjan Lal Tripura chuan mi palite hi August 29 thleng atan interim bail phalsak a, mahse hei hi Nilaini khan Tripura High Court chuan a hnawlsak leh nghal a ni. Hemi hnu hian mi palite hi investigating officer kuta inpe turin court chuan a hriattir a, investiga-tion oficer hnenah ni hnih chhungin he thil thleng hi chhui chiang turin a hriattir bawk.