Sikkim, Meghalaya leh Nagaland a hri kai te

Sikkim-ah Ningani khan Covid-19 kai hmuh chhuah mi 29 awm lehin, hri kai hmuh chhuah tawh hi mi 829 an tling tawh a ni. Health director general Dr Pempa Tshering Bhutia chuan Ningania RT-PCR hmanga sample 346 endik zinga mi 27 an positive a, rapid antigen test hmanga endik mi 80 zingah pahnihin hri hi an kai tih a sawi. Hri kai hmuh tawh zingah mi 353 chu enkawl dam ni tawhin, hri kai mek hi 445 an awm.

Meghalaya-ah Ningani khan coronavirus kai mi 51 hmuh belh leh niin, an state-a hri kai hmuh tawh hi mi 990 an tling tawh a ni. Hri kai zinga mi 345 chu enkawl dam ni tawhin enkawl mek hi mi 640 an la awm a, an zingah  BSF sipai 194 leh armed force dang a mi 61 an tel. Rhi-Bhoi district-ah hri kai mek hi an tam ber a, mi 70 an awm a ni. Health official-te chuan Ningani thleng khan sample 39,782 test tura lakkhawm a ni tawh a, heng zingah 380 result chu la nghah mek a nih thu an sawi. Hripui leng vanga ram puma lockdown puan a nih hnuah, hmun danga tangkhang mi  25,767 an haw tawh bawk.

Nagaland-a armed force zingah Covid-19 kai an pung chak hle. Ningania state chhunga hri kai hmuh thar mi 82 zingah sipai mi leh sa hi mi 39 telin, armed force zinga hri kai hmuh tawh hi 1,117 an tling tawh a ni. Health department-in a tarlan danin, an state-a hri kai hmuh chhuah tawh mi 2,580 zingah armed force mi leh sa 1,117, state dang aṭanga haw 1,046, frontline worker 182, traced contact 180 leh mi dang 53 an tel. 

Principal secretary (Home), Abhijit Sinha chuan paramilitary force zingah hri kai an pun zel avangin, state sorkar chuan hmun dang aṭanga sipai luh hun tur rel ṭhain, September thla thleng chu sipaite hi an luh a khap rih a ni. Hemi rual hian thuneitute chuan sipai zingah hri kai hmuh an tam chhan chu test neih tam a nih tak vang niin an sawi. Sipai hri kai zinga 303 chu district hrang hranga military Covid-19 hospital-ah enkawl mek an ni.