Assam-Meghalaya ramri buaina tiziaawm turin State 2-a zirlai pawlte'n joint peace committee nei

Assam state-a West Karbi Anglong district leh Meghalaya ramriah inremna leh boruak muanawm a awm theihna turin, Karbi Students Association (KSA) leh Jaintia Students Movement (JSM)-te chuan Inrinni liam ta khan Guwahati-a Karbi Hemtun hmunah joint meeting an nei.

KSA central committee president Jemson Timung chuan meeting hi kaihruaiin, president hlui Robindra Rongpi leh Stalyn Ingti, General Secretary, Ramsiing Tokbi leh Assistant General Secretary, Mohim Tisso-te pawh an tel a ni. Meghalaya lam aiawhin JSM-central body President, Leningstar Rymbai, working President, Jimmy Raul Kharmuti leh Assistant General Secretary, Heybogme Thyrphet an tel bawk.

Meeting-ah hian Assam - Meghalaya ramria boruak ṭha a awm theihna tura KSA leh JSM hruaitute hmalakna ve ve chu lawmawm an tih thu pawl pahnihte hian an sawi a, boruak muanawm a awm chhunzawm zel theih dan turte pawh sawiho a ni.

Zirlai pawl pahnihte hian ramri hrula khawsate inkarah tun hnaiah intihthiam lohna chhuak rih mah se, Karbi leh Jaintia hnamte hi hun rei tak chhung inngeih takin an lo inṭhenawm ṭhin tih an sawi. Ramriah remna leh muanna a awm theihna turin thawhho zel an tum thu an sawi.

Meeting-ah hian Karbi leh Jaintia zirlai pawl member awmna Pnar leh Karbi Peace Committee din a ni a, JSM aṭangin Leningstar Rymbai leh Heybogme Thyrphet-te telin, KSA aṭangin Jemson Timung leh Sar-im Bey-te an tel.