Arunachal Pradesh-in hydro deal 44 a titawp

Arunachal Pradesh sorkar chuan private developer-te nena hydro-power siamna tur inremna 44 a lo siam tawh chu hmalakna a awm loh avangin a titawp.

Power department changtu, Deputy Chief Minister Chowna Mein chuan Pathianni khan thuthar la khawmtute bulah hydro deal 44 an tihtawp thu hi a sawi a ni. Heng project aṭang hian kawlphetha megawatt 32,415 siam chhuah theih beisei a ni a, project tihtawpte hi Central PSU-ah agreement thar siam turin hlan let an ni ang.

Arunachal Pradesh sorkar hian CPSU hrang hrang leh independent power producer-te chu kawlphetha megawatt 46,943 siam chhuahna tur, hydro-power project 153 a ziahpui tawh a ni.

Mein chuan project 44-te tihtawp a nih chhan sawiin, "Project tam tak hi chhan hrang hrang avangin allotment siam hnuah hnathawh hmuh tur a awm lo a, a thawktu turte hnenah vawi tam tak notice pek an nih hnu pawhin hmalakna engmah a awm loh avangin tihtawp an ni," a ti.

Project 44 zinga 9-te chu thawhhona thuthlung (agreement) thar ziahpui leh tawh an ni a, MW 1,300 pek chhuah theih beisei a ni. Project dang ho pawh an bawhzui thuai dawn niin Mein chuan a sawi. MW 120 Nafra leh MW 90 New Melling project te chu North Eastern Electric Power Corporation Ltd. - ah pek an ni a, MW 420 Amullin, MW 500 Emini leh MW 400 Mihundon project-te chu Sutlej Jal Vidyut Nigam Ltd.-in an thawk ang. Mein chuan sorkar laipui-in project 29 a siamte chu CPSU (National Hydroelectric Power Corporation leh Tehri Hydro Development Corporation Ltd.)-te'n an zir chiang mek a ni, a ti bawk.