Assam-Arunachal Pradesh ramriah mi 2 kah hlum an ni

Assam-a Dhemaji district-ah Thawhtanni khan tu tih hriat lohte'n mi pahnih an kap hlum a, midang pahnihin hliam an tuar bawk. Pawikhawihtute hi Arunachal lam mi nia rin an ni.

Pawikhawihna thlenna hmun hi state pahnih ramri hrula awm Panbari khua a ni. Boga Chutia leh Monitu Gogoi-te thingphun tura an ram kal chu kah hlum an ni. Tualthihna thleng vang hian Dhemaji khuaah chuan boruak a sosang hle a, khaw mipuite chu he inthahna thleng an duh lohzia lantir nan leh tualthattute man phutin an pungkhawm.

Assam education minister Ranoj Pegu chuan a bial chhunga mi pahnih kah hlum an ni leh, midang pahnih kah hliam an ni chu pawi a tih thu a sawi. "Dhemaji district-a Assam -Arunachal ramri Panbari khuaa inthahna thleng hi na takin ka dem a ni," a ti. Director General of Police GP Singh chuan senior police officer-te chu he thil thlenna hmunah hian an kal nghal a, tualthattute hi man tuma zawn nghal an nih thu a sawi.

Assam Chief Minister Himanta Biswa Sarma chuan police-te'n he thil thleng hi an bawhzui nghal thu leh misualte hi an phu tawk hremna pek an nih tur thu a sawi. Sarma chuan,"Dehamri district-a ramrite hi ṭhen fel a la ni lo a, ṭhenawm state-a mi ṭhenkhatte'n ram chuhin buaina an rawn siam ṭhin," a ti. Arunachal Chief Minister,Pema Khandu pawhin misualte hi na taka hrem an nih tur thu sawiin, he thil thleng a hriat veleh MLA leh DC-te biain, pawikhawihna hmun hi tlawh turin a tir nghal a ni.