High Court-in Nagaland-a uisa khapna ṭhiat

Nagaland sorkarin kum thum dawn liam taa state chhunga uisa ei leh zawrh khapna a tihchhuah chu Gauhati High Court Kohima bench chuan a ṭhiahsak.

Kar liam ta Zirtawpni khan Gauhati High Court Kohima Bench chuan 'order' tichhuakin, Nagaland sorkarin kum 2020, July ni4-a Food Safety Authority of India, Food Safety and Standards Act, 2006, leh Food Safety and Standards (Food Products Standards and Food Additives) Regulation, 2011 hnuaia zawrh tura ui lak luh, bazar leh restaurant-a uisa zawrh leh ei khapna thupek a tihchhuah chu ṭhiah a nih thu a tarlang.

State sorkarin uisa khapna thupek a tihchhuah hian khawtlangah lungawilohna a thlen a, India danpuia Article 371(A)-in Naga hnam customary law leh khawtlang chin ṭhin chawi nun zel theihna chanvo a pek chu a kalhah an ngai a ni. Hemi rual hian uisa khap duh lo tam tak an awm laiin; thlawptu ṭhahnem tak a nei ve bawk a ni.

State sokarin uisa khapna thuchhuah a siam duh loin Kohima-a cheng mi pathum chuan India danpui Article 226 tlawhchhanin Court-ah an zualko a, Article 14, 19 leh 21-te leh principles of natural justice a bawhchhia tiin petition an thehlut. Petitioner-te ukil Iralu chuan petitioner-te hi Kohima Municipal Council hnuaia uisa zawrh phalna nei an ni a, kum tak tak chhung hei hi eizawnna atan an lo hmang tawh tih a sawi. Uisa ei hi Naga hnam custom leh culture-a bet tlat a nih thu sawiin, Naga hnam chanchin inziahna pawh uisa ei chungchang hi hmuh tur a awm thu Court-ah a thlen.

Court chuan sorkar ṭanchhan chu uisa khap burna dan siam nghalna atan a tawk lo tih sawiin, Prevention of Cruelty to Animals Act, 1960 leh Indian Penal Code hnuaia rante'n chanvo an neihte chu ṭha zawka hman a nih theih dan tur kawng zawn zawk tur a ni, a ti.