Manipur-ah internet service titawp chhunzawm zel

Manipur sorkar chuan tualchhung buaina thleng avanga an state-a internet service a tihtawp chu June ni 10 thleng a titawp chhunzawm dawn.

Commissioner (Home) H Gyan Prakash chuan order tichhuakin, state pumah June ni 10, tlai dar 3 thleng mobile data service, broadband pawh huamin tihtawp a ni tih a sawi.

May ni 3-a tualchhung buaina a chhuah khan Manipur sorkar chuan internet service hi a titawp a, hemi hnu hian pawhsei chhunzawm zel a ni. Hei hi thu dik lo thehdarh leh, mipuite tharum leh pawikhawih tura infuihna thleng thei venna atana ti an nih thu an sawi. Manipur DGP chuan hmun ṭhenkhatah in hal leh pawikhawihna thleng report a la awm reng niin a tarlang.

Meitei leh tribal-te inkara buaina a chhuah hnua police leh security force-te silai laksakte chu hmuh let tuma beihpui thlak mek a nih thu Army chuan a sawi. Sorkar official chuan silai leh ralthuam dang 4,000 vel chu buaina chhuah lai hian rukchhuah a ni tih sawiin, heng zingah hian silai 789 leh silai mu 10,648 chu hmuh let a ni tawh tih a sawi bawk.