Manipur Assembly-in tribal MLA 10-te show cause notice pe

Manipur Assembly chuan an state aṭanga inrelbawlna hran phuttu, tribal MLA 10-te chu an thil phut chungchangah insawifiah tura hriattirin, show cause notice a pe.

Kuki-Chin MLA-te hnena hriattirna hi Assembly-a ethics and priviliges committee-in a pe a ni. Tribal MLA-te chu June ni 16 thleng an insawifiahna thehlut turin a ti a ni.

State chhunga Meitei leh tribal-te inkara intihbuaina nasa tak a chhuah hnuah, tribal MLA 10-te hian tribal-te chenna, hill area chu Manipur aṭanga inla hrang a, inrelbawlna hran pek an phut a ni. May ni 12-a thuchhuah an siamah, "Manipur hnuaiah chuan kan mi leh sate hi an awm ve ta lo a ni," an ti. Manipur sorkar chu buaina siamtute thlawpah an puh bawk.

Thuchhuah an siamah hian, "Manipur state chuan min venghim zo tawh lo a, hei vang hian India sorkar hnenah, India constitution hnuaiah rorelna hran min siamsak a, Manipur nena inṭhenawm a, boruak muanawm tak hnuaia awm kan duh a ni," an ti.

Manipur aṭanga inla hrang a, rorelna hran siam phuttute hi Aokholet Kipgen (Saitu), Ngursanglur Sanate (Tipaimukh), Kimneo Haokip Hangshing (Saikul), Letpao Haokip (Tengnoupal), LM Khaute (Churachandpur), Letzamang Haokip (Henglep), Chinluthang (Singngat), Paolienlal Haokip (Saikot), Nemcha Kipgen (Kangpokpi) leh Vungjagin Valte (Thanlon)-te an ni. An zingah hian rorel lai BJP MLA pasarih awmin, minister pahnih an awm bawk.