Assam tribal pawl-in Tai Ahom ST status pek rawtna dodal

Assam-a tribal pawl, Coordination Committee of Tribal Organization of Assam (CCTOA) chuan state sorkarin Tai Ahom hnam tana Schedule Tribe status leh special reservation pekna tur rawtna a siam chu an dodal.

State-a rorel lai, BJP hian 2014 Lok Sabha inthlan dawn khan Tai Ahom te leh ethnic group dang panga - Koch Rajbongshi, Matak, Chutia, Moran leh Adivasi-te ST status pek a lo tiam tawh a ni.

Assam sorkar chuan Thawhlehni khan Tai Ahom-te ST status pek dan tur chungchangah ngaihtuahin meeting a ko a, meeting hi Tribal Affairs Minister, Ranoj Pegu leh Parliamentary Affairs Minister Pijush Hazarika-te'n an kaihruai. Pegu chuan ST community dangte dinhmun leh chanvote nghawng buai si loa Tai Ahom-te ST status pek an nih theih dan ngaihtuah ho a nih thu a sawi.

Hetih lai hian sorkar rawtna siam hi dodalin, CCTOA secretary general Aditya Khakhlary pawhin, "India danpui hnuaiah ST category huam chhungah ST-vekte tan reservation dang siam belh theihna a awm lo. Tai Ahom-te ST status pek an nih chuan Centrally-funded institution-a hna lak leh zirlai lak chungchangah nghawng ṭha lo tak a nei dawn a ni," a ti.

Khakhlary chuan, "Tai Ahom-te ST status pek an nih chuan state sorkar-in Autonomous Council paruka ST seat a reserve-te chu Tai Ahom-te hian an chuh thei tawh dawn a, hei hian tuna ST-te dinhmun a tihchhiat bakah ST-te humhalh tura din Autonomous Council hian awmzia a nei dawn lo a ni," tiin a sawi. Kum 1996-a sorkar laipuiin ordinance hmanga Koch Rajbongshi-te ST status a pek pawh khan Assam-a ST dik takte'n an tuar phah nasa hle tih a sawi a ni.

Meeting-ah hian CCTOA aiawhin an President, Sukumar Basumatary leh Secretary General, Aditya Khakhlary an tel. Tai Ahom lam aiawhin All Tai Ahom Students Union (ATASU) President, Tai Ahom Yuva Chatra Parishad President, Purbanchal Tai Sahitya Sabha General Secretary , Ahom Sabha President leh Tai Ahom Jatiya Parishad President leh General Secretary-te an tel bawk.