Manipur-a internet tihtawp sut turin Supreme Court ngen

Manipur High Court ukil Victor Singh leh businessman Mayengbam James chuan May ni 3 aṭanga Manipur-a internet tihtawp a ni chu Supreme Court-ah khingletin; petition an thehlut.

Manipur sorkar chuan Thawhlehni khan internet tihtawp hi June ni 10 thleng atan a pawtsei leh a ni.

Petition thehluttute chuan tualchhung buaina chhuah vanga internet tihtawp hian khawtlang leh an chhungkuaah pawh nghawng nasa tak a neih thu sawiin, an fate pawh school an kaltir theih loh thute, bank-a an pawisa an khawih chet theih loh thu te, client-te aṭanga pawisa dawn te, hlawh pek te leh email leh WhatsApp-te an hman theih loh thu an thlen.

Internet tihtawp chu India danpuiin chanvo a pek, Article 19(1)(a) hnuaia freedom of speech and expression an neihte leh Article(19)(1)(g)hnuaia sumdawnna kalpui theihna an neihte chu a kalh a ni, an ti. State sorkar chuan internet tihtawp lailawk a nih tur thuchhuah hi an website-ah leh Twitter-ah an puangzar lo a ni, an ti bawk. State chhunga internet tihnuntir tawh turin court chu an ngen.