Manipur-ah silai 57, silai mu 318 leh bomb 5 hmuh let belh

Manipur sorkar security advisor, Kuldiep Singh chuan tualchhung buaina chhuah laia security force-te ralthuam ruk chhuahsak zinga silai 57, silaimu 318 leh bomb panga hmuh let belh an ni tih Nilaini khan a sawi. Hengte nen hian silai leh silaimu hmuh let tawh zawng zawng hi 868 leh 11,518 a tling tawh a ni.

State chhunga valley district pangaah darkar 12 curfew thlah dulin, hill district-ah darkar 8 aṭanga darkar 10 chhung curfew thlah dul a ni bawk. Hill district parukah chuan curfew hi puan a ni lo.

Singh chuan, "Manipur-ah darkar 24 chhungin silai 57, silaimu 318 leh bomb panga chu Imphal East-a Porompat police station leh Kakching district-a Sugnu police station huam chhungah hmuh let a ni tawh a, heti hian a vaiin vawiin thlengin silai leh silai mu 868 leh 11,518 hmuh let a ni tawh," a ti.

NH-37 kawngpui pawh hawn a ni tawh a, Nilaini khan motor ruak 244-in Jiribam panin Imphal an chhuahsan. Thil phurh nei motor 212-in Noney chhuahsanin, tanker leh truck 212-in Jiribam an chhuahsan ve bawk.

MBBS/BDS zirna tura entrance test, National Eligibility cum Entrance Test (NEET) UG 2023 chu centre 22 (Imphal West district-ah centre 12 leh Imphal East district-ah centre 10) -ah Thawhlehni khan tluang taka neih a ni a, zirlai ṭhahnem takin exam an hmachhawn thu Singh chuan a sawi.

State minister leh MLA-te pawhin hmun hrang hrang tlawhin inremna leh nunphung pangngai a awm leh thuai theih nan theihtawp an chhuah a, a tam thei ang ber mipuite leh pawl hote an kawm, tih Singh-a thuchhuah chuan a tarlang. Security force-te pawh an duty bakah, Manipur-ah nunphung pangngai a awm leh thuai theih dan tur chu pawl hrang hrangte leh khawtlang hruaitute an sawipui tih a tarlang bawk.

Manipur-ah hian May ni 3-a tribal -te'n Meitei-in ST status an phut duh lohna lantira kawngzawh, 'Tribal Solidarity March' an huaihawt aṭang khan tualchhung buaina hi a irhchhuak a ni. Hnam leh hnam inkara buaina chhuakah hian mi 100 chuangin nunna an chan tawh a ni.