Tripura : July-ah India-Bangladesh border haat hawng dawn

Covid-19 hri leng vanga hun rei tak khar tawh, Tripura-a Sepahijala district-a weekly market, Kamalasagar-Kasba border haat chu July thlaa hawn theih tawh beisei a ni tih official chuan a sawi.

South Tripura district-a Srinagar-a border haat chu May thla khan hawn a lo ni tawh a ni.

Kamalasagar-Kasba border haat hawn a nih theihna atana hma la turin karleh hian Indo-Bangla joint team chuan an tlawh dawn a, siam ṭhat ngaite enfiahin July chawlhkar hmasa bera hnathawhte an endik leh ang a, hemi hunah hian border haat hawn hun tur pawh an tifel nghal dawn a ni.

Bishalgarh Sub-Divisional Magistrate (SDM) Binoy Bhusan Das chuan mipui lam aṭang pawhin border haat hawng tura nawrna hi a na tawh a, July thla chhung chuan hawn hman ngei a nih an beisei thu a sawi.