Ramria insumdawn tawnna tihhmasawn nan Sikkim Chief Minister-in Nepal ramri a tlawh

Sikkim Chief Minister Prem Singh Golay chuan India-Nepal ramria insumdawn tawnna mumal zawk a awm theih nan Geyzing district-a Chewabhanjyang hmun a tlawh. Golay hi Sikkim state aṭanga Chewabhanjyang tlawhtu CM hmasa ber a ni.

India-Nepal ramriah hian multi-trade hawn tuma hma lak a ni. Golay chuan, "Ramri hawnna hmunah India leh Nepal mipui tana ṭangkai tur sumdawnna hmun siam a ṭul. Sector hrang hrang zirna, hriselna, zin mite hipna, sumdawnna leh ram pahnihte cultural exchange-te thlengin a awm thei a ni," a ti. Sikkim chuan Nepal khawchhak lama awmte chu dam lohna thilah englai pawhin puih an hreh lo tih a sawi bawk.

Golay chuan India-Nepal ramria trade corridor siam hi thil ṭul tak a ni tih sawiin, India Prime Minister Narendra Modi leh Home Minister Amit Shah-te pawh vawi tam tak a lo sawipui tawh tih a sawi. Trade corridor chu siam mai theih a nih tawh thu sawiin, "India leh Nepal sorkar pawh corridor siam chungchangah hian an inbe tawh a, Nepal hian India nena insumdawn tawnna tur kawng dap hi rem tiin, phalna pawh a pe tawh a ni," a ti.