Manipur boruakin ziaawm lam a pan; Sorkar laipuiin chhawmdawlna pek a remti

Manipur sorkar security advisor Kuldiep Singh chuan Manipur tualchhung buaina avanga in leh lo chante leh awmna tur nei lote tan, sorkar laipui chuan relief package Rs vbc 101.75 pek a remtih thu Ningani khan a sawi.

Kuldiep Singh chuan Manipur boruak pawh a dai ṭan tih sawiin, darkar 48 chhungin buaina chhuak thar a awm loh thu a sawi bawk.

Singh chuan, "Manipur-a in leh lo chante tan, Ministry of Home Affair chuan Rs vbc 101.75 relief package pek a remti. Union home minister Amit Shah a lo zin khan, state sorkar chu MHA hnenah hian in leh lo chante tana chhawmdawlna pe tura dilsak turin a hrilh a ni," a ti.

Buaina chhuak vanga tlanchhia mi 37,450 velchu relief camp 272-ah an la khawsa mek. District 13-ah relief camp hi siam a ni.

Boruak ṭha leh muanawm a awm zui theihna atan minister leh MLA-te chuan buaina chhuahna hmun hrang hrangte chu an tlawh kual mek a, tualchhung mipuite leh civil society organisation-te hmuin, boruak ṭha siam tura hma la zel turin an ngen.

Security force-te pawhin patrolling duty an la chhunzawm reng a, khawthlang hotute leh pawl hrang hrangte meeting an neihpui bawk.

Meitei leh tribal-te inkara buaina chhuak chungchangah Manipur sorkar chuan case paruk chu Central Bureau of Investigation (CBI) a chhuitir dawn a, heng zingah hian he buaina chhuak hi a hma aṭanga lo ruahman lawk a ni em, tihte a tel. Buaina chhuak kaihhnawihah hian FIR 3,734 ziahluh a ni tawh a, Imphal West district bikah 1,257, Kangkokpi-ah 932 leh Bishnupur district-ah FIR 844 ziahluh a ni tawh.