Assam sorkarin Oct 2-ah thingṭiak vbc 1 phun dawn

Assam chief minister Himanta Biswa Sarma chuan Ningani khan Kamrup district-a Chandubi hmuna Amrit Plantation Programme a hawnnaah thu sawiin, October 2 hian Mahatma Gandhi piancham pualin Assam sorkarin thingṭiak vbc 1 phun a tum tih a sawi.

CM Sarma chuan, thingṭiak phunnaa tel zawng zawngte hnenah sorkarin lawmthu sawi nan Rs 100 ṭheuh a pek tur thu leh, kum thum hnua a la nun chuan Rs 200 an dawn leh tur thu a sawi. Ramngaw behchhana economy chawikan a nih theih nan, state sorkar chuan thing hralh chi, sal, teak leh a dangte phun uar tura mipuite fuihin, hma a la mek tih a sawi bawk.

Assam-in ramngaw a neih zinga 20% vel chu tihchereu a nih tawh thu sawiin Sarma chuan, "A nghawng hi mitinin kan tuar mek a, insak nan mipuiin nasa takin ramngaw kan tichhia a ni," a ti. Sarma chuan tuialthei hmanna pung hian hlauhthawnawm khawpa global warming a tihzual thu tarlangin, carbon emission titlem turin mipui a ngen.

Assam state chhunga ramngawte humhalh tura sorkar hmalaknate sawiin Chief Minister chuan, kum hnih chhungin Lumding Reserve forests, Pabho Reserve forest, Burhachapori Wildlife sanctuary leh Orang National Park-ah te eviction drive kalpui a ni a, bigha 61375 ramah hian thingkih a ni tawh lo a ni, a ti. State sorkar chuan ramngawin a tuam zat hi 36% aṭanga 39%-a tipung turin hna a thawk mek tih a sawi bawk.

Sarma chuan, nipui lai chauh lo ni lo, kumtluanin thingṭiak phun, thingkung leh ramngaw humhalhte an uar deuh deuh dawn tih sawiin, thing phun beihpui thlaka Jan Bhagidari hman a rawt bawk a ni.