EMRS sak an ni thuai dawn : Meghalaya Education Minister

Meghalaya education minister Rakkam A Sangma chuan Eklavya Model Residential School (EMRS)-te chu kuminah sak ṭan an ni dawn tih a sawi.

EMRS sakna tur hi ram a awm mai loh avangin tihkhawtlai a ni a, mahse Minister chuan school sakna tur ram ruak ngaihtuah turin block-te chu thla khat hun pek an ni tiin, he hi an ti thei lo a nih chuan ram ruak awmna hmun dangah sawn an ni dawn a ni, a ti.

Sorkar laipui hnuaia Tribal Affairs Ministry chuan Meghalayah-ah Eklavya Model Residential School 40 sa turin a lo sanction tawh a ni.

Education department advisor HM Shangpliang chuan, "School saknaa inhnamhnawih tur, stakeholder-te chu Education Minister hoa meeting tura koh an ni a, a rang thei ang bera school-te hi sak an nih theihna tur kawng kan dap dawn," a ti. "Sorkar laipui policy angin block-te hian school sakna atan hian ram hectare 15-a zau a thlawnin an pek a ngai a, hei hian buaina lian tak a siam. Hmun ṭhenkhatah hetiang zat ram hi a awm lo a, sorkar chuan thla khat chhung hun pein, school sakna tur ram an pek theih loh chuan school hi hmun dangah sawn a ni ang," a ti bawk.

Kum 4-5 chuang school sak hun tihkhawtlai a nih tawh thu sawiin Education Minister chuan, "Kan tlai tawh hle a, mahse kumin chhunga EMRS-te sak ṭan an nih ngei theih nan hma ka la dawn," a ti. EMRS 40-te sak a nih theih dan tur sawipui turin district tina depurty commissioner-te a hmuh tur thu a sawi.