Assam CM-in Manipur a tlawh

Assam Chief Minister Himanta Biswa Sarma chuan Inrinni liam ta khan Manipur state a tlawh a, tualchhung boruak ṭha a awm theih dan turte sawipuiin Manipur Chief Minister, N Biren Singh bakah, civil society organisation hrang hrang aiawhte a kawm.

BJP kaihhruai North East Democratic Alliance (NEDA) convenor ni bawk, Sarma chuan Imphal a thlen veleh CM Secretariat-ah CM Singh, minister leh official dangte chu meeting a neihpui nghal a ni. Hemi hnu hian hotel lamah civil society organisation hruaitute leh MLA-te a hmu leh a ni.

Inrinni vek khan sorkar laipui chuan Manipur-a boruak ṭha leh nunphung pangngai a awm theihna tura hma la tur, Peace Committee a din tih a puang bawk. Committee chair-person atan Manipur governor, Anusuiya Uikey chu ruat a ni a, member-ah hian Manipur CM, minister, MP, MLA, political party hrang hranga hruaitu, civil servant chawl tawh, educationist, literature, artist, social worker-te bakah hnam hrang hrang aiawhte ruat an ni dawn tih Ministry of Home Affairs (MHA) chuan a sawi.

MHA in Manipur buaina chhui chiang tura a ruat, member pathum awmna Commission of Inquiry chuan Zirtawpni khan Imphal an thleng tawh bawk. MHA chuan panel hi a rang thei anga report theh lut turin a lo ti tawh a, sitting an neih hmasak ber aṭanga thla ruk aia tlai loah theh lut turin a ti a ni.

Kuki pawl hrang hrangte chuan Zirtawpni aṭang khan Imphal-Dimapur National Highway 2 an dang leh a, sorkar chuan Imphal-Jiribam National Highway lam aṭangin mamawh chawkluh a tum.

Manipur sorkar chuan May ni 3-a tualchhung buaina a chhuah ṭan aṭanga internet service a tihtawp tawh chu Inrinni khan a ṭum riatna atan a pawtsei leh a, June ni 15 thleng a awh ang.