AIFUCTO-in NEP-20 duh lohna lantir chhunzawm dawn

All India Federation of University and College Teacher’s Organisation (AIFUCTO) chuan Zirtawpni liam ta khan Kohima Science College-a North Eastern Council meeting cum National Seminar neiin, ram chhunga National Education Policy (NEP) 2020 hman chu an duh lohzia lantir chhunzawm an rel.

AIFUCTO General Secretary, Prof Arun Kumar chuan, "Ram puma kan zirna inte hian neoliberal economy changchawia zirna kalpui hi a tuar mek. Sorkarin hemi chungchang a ngaihthah leh, sumdawnna atana zirna in hman hi kan ram education system atana thil hlauhawm tak a ni," a ti.

Kumar chuan NEP-2020 chu dodalin, he policy hi kum zabi 21-naa zirna ina hmasawnna thlentu tur angin chhuah mah se, policy-ah hian privatization, commercialization, centralization leh saffronisation tumna lian tak a inphum tih a sawi. NEP hi India danpuiin ram mipute tana zirna kalpui dan tur a duan lungphum tihchhiatna tur, “corporate-communal conspiracy” a ni, a ti. "NEP policy-ah hian thil dik lo a tam em avangin siam ṭhat theih a ni lo a, ram mipuite hmakhua ngaiin hnuhkir a ni leh tur a ni," tiin a sawi.

AIFUCTO President Prof. Kesab Bhattacharya pawhin NEP 2020 chu ram tan policy hlauhawm tak niin a sawi a, NEP 2020-ah hian mipa leh hmeichhia intluktlanna tur leh hmeichhia-te zirna chawikanna tur engmah a awm lo a, he policy avang hian sorkar school-te khar an la ni ang a, high school chinah drop-out an pun phah bawk ang, a ti.