Sorkar laipuiin Peace Committee a dinah Manipur CM a tel avangin Kuki hnamte tel tum lo

Sorkar laipuiin Manipur-a boruak ṭha leh nunphung pangngai a awm chhoh leh theihna atana hma la tura a din, Peace Committee-ah Manipur Chief Minister, N Biren Singh telh ve a nih avangin Kuki hnam aiawh tam zawk chuan he panel hi boycott an tum tih an puang.

Ministry of Home Affairs (MHA) chuan June ni 10 khan Peace Committee hi a din a, CM Singh tiamin member 51 a ruat a, governor Anusuiya Uikey chuan he committee hi a ho dawn a ni.

Peace Committee-a CM telh chungchangah hian Kuki aiawhte chuan biak rawn an ni lo tih an sawi a, member-a ruat mi tam zawkte hian panel-a telh tur hi an remtihna lak a nih loh thu an sawi ve bawk.

Member zinga pakhat, Kuki Inpi Manipur (KIM) President, Ajang Khongsai chuan Manipur sorkar chu inremna thu a sawipui loh tur thu sawiin,"Panel ah hian Kuki hnamte laka indona puangtu COCOMI (Coordinating Committee on Manipur Integrity) an tel. Remma leh muanna chu kan duh, mahse, tharum thawhna a awm mek lai hian Manipur sorkar chu inbiakna kan neihpui thei lo," a ti.

Indian Defence Accounts Service (IDAS) hlui, J. Lhungdim pawhin panel-ah hian a hming chu a remtihna la loa telh a ni tih a sawi. Kum 2020- a pension-a chhuak tawh, Lhungdim chuan, "Kum 2016 khan Russia-ah arms deal siam turin thawn ka ni a, kum 37 sorkar hna ka thawh hnu pawhin Chief Minister hian foreingner angah min la chhiar tho. Panel hi sorkar laipui official-in a ho loh chuan awmzia a nei dawn lo. Tualchhung buaina chhuakin thla khat chuang a awh hi thil zahthlak a ni," tiin a sawi.

Panel-ah hian June ni 1-a chawpchilh taka post siam chawp, Officer on Special Duty (OSD) Home-a sawn tak Manipur Police Director General hlui P. Doungel pawh a tel. Doungel hi Kuki hnam niin, tun thlaah a pension ang. Manipur-a hnam leh hnam inkara buaina a chhuah hnu, May ni 3 aṭang hian Doungel hi hnathawk thei loa siam a ni.

All Manipur United Club Organisation (AMUCO) President, Nando Luwang pawhin panel-ah telh a ni tih chu a hriat loh thu a sawi a, a tel tur leh tur loh chu an pawlin an la ngaihtuah tur thu a sawi.

MHA chuan committee din chuan state chhunga hnam leh hnam inkara buaina chhuak chu tihreh dan tur kawng a zawng anga, inremna a awm theih nan pawl intibuaite'n inbiakna an neih theih dan tur a ngaihtuah ang, a ti.

Indigenous Tribal Leader Forum chuan peace committee din a nih hmain state chhungah boruak muanawm leh nunphung pangngai a awm leh theih nana hmalak hi a pawimawh hmasa tih an sawi. Peace Committee-ah state chhunga buaina chhuak chungchanga hnarkaitu ber CM, N.Biren Singh telh a ni chu na takin a dem tih ITLF chuan an sawi bawk.