Meghalaya : Eptu hruaituin political party zawng zawngte thawkho turin sawm

Meghalaya Legislative Assembly-a leader of opposition, Ronnie V Lyngdoh chuan an state-in kawlphetha lama harsatna a tawh mek sut kian dan ngaihtuahin, political party zawng zawngte chu party rilru dah ṭhaa, thawkho turin a ngen.

Lyngdoh chuan press conference-a neihnaah state-in kawlphethaa harsatna an tawh chu sorkar lai emaw, term hmasa lama sorkarna chelhtute emaw bik vang a ni lo tih sawiin, party hotute chu inpuhtawnna ban sana, state-in harsatna a tawh mek chu sut kian theih dan tur kawng dap turin a ngen bawk.

An state-in kawlphetha siam chhuak tura a innghahna ber chu hydro-electric power project a ni a, mahse, sik leh sa inthlak danglam vang leh khaw chin mumal loin harsatna a siam chhoh thu Lyngdoh chuan a sawi. Mipui pung zel leh electronic device hrang hrang - mobile phone, TV, laptop leh inchhung thil fridge leh air conditioner hmang an pun zel avangin tunhma aiin kawlphetha mamawh zat pawh a sang zel tih sawiin, hydro-electric power project bakah kawlphetha siam chhuahna tur kawng dang, solar power leh wind energy-te ngaihtuah tel a ṭul thu a sawi.

Eptu hruaitu chuan thermal power plant leh state chhunga gas pipeline phum tura hmalakna chuan an harsatna tam tak a chhawk ngei a beisei thu a sawi a, gas hmanga kawlphetha siam chhuah chu hydro-electric project aiin environment tan pawh a him zawk a ni, a ti.

Lyngdoh chuan tuna Meghalaya state Power Minister chu a ring tawk tih a sawi a, state-in harsatna an tawh mekte sut kianna tur kawng an dapnaah a thiamnate an chawr ṭangkai hle dawn tih a sawi.