Ruah sur vangin Dimapur khawpuiah tui tling nasa

Pathiannia ruah nasa taka a sur avangin Nagaland-a Dimapur khawpui chhung leh a chhehvel bialah tui a tling nasa hle a, in eng emaw zat chu tui hian chimin chhungkaw tam takin harsatna an tawk.

Dimapur Deputy Commissioner, District Disaster Management Authority (DDMA) Chairman ni bawk, Sachin Jaiswal chuan Nagaland state disaster management authority team leh, district thuneitute chuan tuiin a chimna bialte hi an tlawh nghal tih sawiin, tuiin an chenna in a chim mi 150-te chu hmun him lamah sawn chhuah an ni, a ti. Tuilian vanga harsatna tawkte ṭanpui leh chhawmdawl hna hi Assam Rifles sipaite'n an thawk bawk.