Manipur Governor-in Churachandpur a tlawh; Relief centre-a awmte chhawmdawlna pek a tiam

Manipur Governor, Anusuiya Uikey chuan state chhunga intihbuaina chhuak mekah, tualchhung dinhmun zir chiang turin Thawhṭanni khan Churachandpur district a tlawh.

Governor Uikey hian Churachandpur district hi a vawi khat tlawhna a ni a, relief centre pathum - Churachandpur Government College, Salt Brook School leh St. Mary’s School-te tlawhin, heng hmuna awmte chu an mamawh chi hrang hrang, ei leh in, tui thianghlim leh damdawite pek a tiam.

Chanchinthar lakhawmtute a kawmnaah Governor chuan Churachandpur district a tlawh chhan sawiin, "Peace committee-ah chairperson ka nihna angin, community hrang hrang, politician, officer leh pawl hrang hrang hruaitute aṭanga thurawn lak leh an harsatnate lo ngaihthlaksak a, inremna tur kawng zawn hi ka mawhphurhna a ni," a ti.

Uikey chuan pawl ṭhenkhatte chu Tuibong-a 27 Assam Rifles hmunah meeting a neihpui bawk a, an zingah hian Indigenous Tribal Leaders Forum (ITLF) pawh an tel a ni.

ITLF chuan Governor hnenah hian Manipur-a tribal hrang hrangin harsatna an tawhte tarlanna memorandum an thehlut a, peace committee din a nih hma hian state chhungah boruak ralmuang a awm phawt a ṭul tih an tarlang bawk. Meitei hoin Kuki-Zo te laka indo an puan lai hian, buaina chawkchhuaktute inremna lo sawipui chu thil tihchi-ah ITLF chuan a ngaih loh thu an hrilh.

ITLF chuan, "Inrem hmain harsatna sut kian phawt a ṭul. Kan dam chhuahna tura kan beisei awm chhun chu Kuki-Zo hnamte inrelbawlna hran neih a, Manipur sorkar leh Meitei ho lak aṭanga inlak hran hi a ni. Manipur huam china tlang leh ruamte hi ṭhen hran sa an ni a, inrelbawlna hran neih hi thil tihtheih awm chhun a ni tawh. Inrelbawlna hran a awm hnuah chiah inremna hi a awm thei ang," tiin an sawi.

Kar liam ta Inrinni khan, Ministry of Home Affairs (MHA) chuan Manipur tan hian Peace Committee a din a, member 51 ruat niin, Governor hian committee hi a ho a ni. Committee-ah hian Chief Minister, N Biren Singh pawh member atan ruat a ni. Committee hian state chhunga hnam leh hnam inkara buaina chhuak tihreh dan tur kawng a zawng ang a, inremna a awm theih nan pawl intibuaite'n inbiakna an neih theih dan tur a ngaihtuah ang.

MHA chuan committee hian khawtlang inpumkhatna leh inhriatthiam tawnna a thlen bakah, hnam hrang hrangte inkarah inpawhtlanna a thlen dawn a ni, a ti.