'One Family One Job' scheme hnuaia bante ruai leh turin CAP-in Sikkim sorkar kar khat chhung hun a pe

Sikkim-a political party din thar, Citizen Action Party (CAP) chuan state sorkar hnenah 'One Family One Job' scheme hnuaia hna aṭanga bante leh Teesta Urja Hydro Electric Plant-a thawk Parvati Mangar chu kar khat chhunga hna pe leh turin a hriattir

CAP chuan hna aṭanga ban an nih chhan chu anmahni emaw an chhungkaw member emaw te, eptu party huaihawt programme-ah an kal vang chauh a ni tih a sawi.

'One Family One Job' scheme hi kum 2019 khan Sikkim-ah hian Pawan Chamling sorkarin a tlangzarh a ni.

Thawhtannia Gangtok-a press conference an neihnaah CAP thupuangtu Bina Sharma chuan, State Labour and Power department hnenah hna aṭanga bante kar khat chhunga ruai leh tura nawrna memorandum an theh luh tawh thu a sawi.

Bina Sharma chuan, "Teesta Urja-a thawk Parvati Mangar chu chhan mumal awm loin show cause notice pek a ni a, politics-ah ṭan lam neia puhin ban zui a ni. Sorkarin company hi Mangar ban tur hian a nawr tih a chiang," tiin hetiang deuh chiah hian ‘One Family One Job’ scheme hnuaiah mi pathum ban an ni tih a sawi bawk.