Manipur-ah Interfaith Forum for Peace and Harmony din

Manipur khawpui, Imphal-ah Thawhlehni khan sakhaw hrang hrang telna, Interfaith Forum for Peace and Harmony (IFPH) chu din a ni.

1st MR, Hayingkhongbal, Imphal-a Lainingthou Sanamahi Temple-a sakhaw hrang hrang hotute kal khawm chuan, Manipur tualchhung buaina chhuak tuartute chhawmdawl hna thawhna tur leh, buaina chhuakin a nghawng hnam hrang hrangte inkarah mihring nihna anga inzahtawnna a awm a, rilru natnate thawidam hna thawk turin Forum hi an din.

Meeting-ah hian Manipur-a sakhaw hrang hrang - Christian, Catholic, Sanamahi, Manipuri Gauriya Vaisnav, Islam, Tingkao Ragwang hruaitute leh spiritual communities hrang hrang; Divine Life Society, Art of Living, Brahmakumari, Bhakti Seva Lup leh Gandhian movement Ekta Parishad-te an tel a, an vaiin 34 an ni.

Forum member-te chuan mi sang chuang chunga harsatna thlentu, Manipur-a buaina chhuah chungchangah mawrhphurhna la a, sakhua leh sakhua inkarah inhriatthiam tawnna leh khawtlang inremna a awm theih dan tur kawng ngaihtuah turin thuthlukna an siam.

Meeting-ah hian tualchhung buaina a lo reh theih nan leh buaina chhuak tuarte zawng zawngin damna an neih theihna turin, sakhua zawng zawng huap ṭawngṭai rualna huaihawt an rel bawk. Forum Convener atan hian Deben Bachaspatimayum ruat a ni a, committee member atan sakhaw hrang hrang aiawh mi pahnih zel ruat an ni.