Guwahati rel station hnenah 'Eat Right Station' certificate hlan

Northeast Frontier Railway (NFR) hnuaia mi, Guwahati Railway Station chu khualzinte tan ei leh in tuihnai leh hrisel a buatsaih ṭhin avangin FSSAI (Food Safety and Standards Authority of India) chuan Thawhlehni khan 'Eat Right Station' cetificate a hlan.

NFR CPRO Sabsyachi De chuan Guwahati rel station hian FSSAI-in ei leh in thianghlim buatsaih chungchanga inkaihhruaina a siamte chu a zawm tih sawiin, N.F. Railway hnuaia he certificate hlan hmasak ber a nih thu a sawi. He certificate hian June ni 2, 2023 aṭanga June ni 2, 2025 thleng a huam ang.

‘Eat Right Station’ certifice hi ei leh in vawn ṭhat leh thiang­hlim kawnga FSSAI inkaihhruaina zawm ṭha rel station rel station hnenah hlan ṭhin a ni.

NFR chuan thu­chhuah siamin, N.F. Rail­way hnuaia rel station dang; Rangiya, Lumding, Tinsukia, Alipurduar Jn. leh Katihar station-ah pawh 'Eat Right Station' certificate dawng ve thei turin khualzinte tan ei leh in hrisel leh thianghlim hlui thei tura hmalak mek a nih thu a tarlang.

'Eat Right Station' certificate hi ramchhunga mitinin ei leh in thiang­hlim leh hrisel an neih theih nana FSSAI-in 'Eat Right India' movement a kalpui mek zinga mi a ni.