NSF-in FIR hnukkir; Naga Club thar din an rawt

Naga Students’ Federation (NSF) chuan May ni 27-a mi tu tih hriat lohin an office an suasam chungchanga FIR an theh luh chu an hnukkir tih Thawhlehni khan an puang.

Angami Public Organization (APO) leh Kohima Village Council (KVC)-te'n boruak ṭha a awm theih nana FIR chu hnukkir tura NSF-te an ngen hnuah FIR hnuhkir hi an remti a ni. NSF chuan APO leh KVC-te chunga rinna nghat chungin thuthlukna hi an siam tih an tarlang bawk.

Thuchhuah an siamah, NSF chuan Naga mipuite hnena hnam rilru tuhtu an thlahtute chu an zah hle tih an sawi a, "Tuna Naga Club hi chu Naga mipuiin an pawm lo. Kum 2017/18 bawr vela NSF-in kum 100 tlin lawmna an buatsaih tibuai tura chawpchilh taka din mai a ni," a ti. Naga Club chu Naga hnam ta a ni a, mimalin emaw pawlin emaw neitu nihna a chang thei lo tiin an sawi.

Naga hnam harsatna, Naga political history leh chumiin a hrin Naga hnam chanvote chu mimal ta a ni lo tih sawiin, NSF chuan kum 1929-a Simon Commission-a Memorandum theh luh chu inkaihhruaina atan hmangin Naga Club thar din an rawt.