Tripura-Myanmar railway project ngaihtuah thar leh turin ngen

Centre of Indian Trade Union (CITU) Tripura state unit chuan Tripura-Myamnar railway project siam tawh chu ngaihtuah thar leh turin an ngen.

Tripura Transport Minister hlui leh CITU hruaitu Manik Dey chuan, "Left Front sorkar lai khan Ministry of External Affairs-ah project hi thawnin, a pawmpuina dil a ni," a ti. Project proposal hi Railway Ministry hnenah zir chian turin an lo thawn tawh tih a sawi bawk. Mahse Railway Ministry chuan CITU Tripura unit hnenah hian rawtna theh luh hnuah hun tam tak a liam tawh a, an proposal siam chungchangah hian hmasawnna engmah a la awm lo tih a rawn hrilh a ni, a ti.

Dey chuan Myanmar hian Asia ram dang parukte rel hmanga kalpawhna a siam tawh avangin, he project pakhat lek hmang hian Asia ram parukte chu an kalpawh ve theih phah dawn a ni, tiin a sawi. Project hi railway department official-te rawn chunga duan niin hei hi hetih hunlaia Foreign Minister Sushma Swaraj pawh khan ṭha a tih hle a ni, a ti. Bangladesh nena rel hmanga inkalpawhna bakah, Myanmar nena inkalpawhna siam leh a nih chuan, state economy dinhmun pawh a siam ṭha thei hle dawn tih a sawi.

An state-a railway service kaihhnawih hrang hrang sawipui turin, CITU hruaitute leh CPIM MLA-te chuan North East Frontier Railway (NFR) General Manager pawh hmuh thuai an tum tih Dey chuan a sawi bawk. Covid-19 hri leng khan an state-a rel service a nghawng nasa hle a, lockdown puan vanga chawlhtir an nih hnuah rel tam tak chu tlantir chhunzawm an ni tawh lo a, mipuite'n harastna an tawh phah nasa hle a ni, a ti.