Assam CM-in Guwahati-a flyover siam zawh hun tur bituksak

Assam Chief Minister Himanta Biswa Sarma chuan Guwahati-a flyover pahnih siam hna thawh mek chu a rang thei anga zawh fel a ṭul thu sawiin, an zawh hun tur a bituksak.

Chief Minister hian Public Works Department (PWD – Roads) official-te leh contractor-te chu meeting neihpuiin, Maligaon flyover chu July ni 31, 2023 leh Zoo Road flyover chu August ni 31,2023-a peihfel hman turin a hrilh.

Meeting-ah hian state chhunga traffic tawt tihziaawm dan tur leh mipui veivahna atana infrastructure tihchangtlun dan turte ngaihtuah a ni.

Tun hnaiah flyover sakna hmunah hian intihpalhna a lo thleng tawh a, hnathawhna hmun aṭanga thil tla chuan motor-te tichhiain mi pahnih a hliam a ni. Chief Minister chuan hetiang intihpalhna thleng ang hi pumpelh a nih theih na tura safely protocol siamte chu uluk taka zawm a ngaih thu leh, hnathawktute himna ngaihpawimawh a ṭul thu a sawi.

Flyover pahnih sak mekte hian, Guwahati khawchhung hmun pawimawh laia traffic tawt lutuk chu a tihziaawm beisei a ni.