Manipur-ah Minister official quarters hal a ni

Manipur-a hmeichhe minister awm chhun, Kuki hnam, Nemcha Kipgen-i official quarters, Imphal West district-a Lamphel area ami chu Nilaini zan khan tu tih hriat lohin an hal.

Official-te chuan Industry Minister, Kipgen-i quarters hal a nih hma hian, Khamenlok area-a Kuki thingtlang khaw pakhat chu beih a ni bawk tih sawiin, mi pakua an thih bakah mi dang 10 an hliam tih an sawi. Buaina chhuahna hmun hi Meitei tamna Imphal East district leh tribal awmna Kangpoki district ramria awm a ni

Minister quarters hal a nih lai hian a chhungah awm an awm lo a, kangṭhelhtute chuan kangmei chhuahna hmun hi thleng nghalin, hmun dang a kan kai hmain an ṭhelh mit thei a ni.

Nimin thleng khan eng pawl mahin Minister quarters haltu an nih thu hi an la sawi lang lo.

Nemcha Kigpen hi Kongkokpi bialtu MLA a ni a, Chief Minister, N Biren Singh kaihhruai cabinet member 12 zinga hmeichhe awm chhun a ni. BJP sorkar hmasaah pawh khan minister a ni lo ni tawh bawk.

Kipgen-i hi Manipur-a Meitei leh tribal-te inkara buaina a chhuah hnua tribal-te tana inrelbawlna hran phuttu, Kuki MLA 10 zingah khan a tel a ni.

Tualchhung buaina chhuakah hian mi 100 chuang an thi tawh a, mi 310 velin hliam an tuar. Buaina chhuak zel tur veng tur leh, boruak ṭha a awm theihna atana thawk turin Army leh para-military force-te dah chhunzawm reng an la ni bawk.

Buaina a chhuah hnuah district 16 zingah 11-ah curfew puan chhunzawm a la ni a, state pumah internet service tihtawp a la ni bawk a ni. Imphal East district-a zing dar 5 aṭanga curfew an thlahdul chu zing dar 6-ah sawn a ni a, Imphal West district-ah zing dar 5-a thlahdul chu zing dar 9-ah sawn hlat a ni

Meitei hnamin Schedule Trice (ST) status an phut duh lohna lantira May ni 3-a ‘Tribal Solidarity March’ neih a nih aṭangin buaina hi a chhuak a, thla khat chuang zet tualchhung buaina hian a awh tawh a ni. Meitei hnam hi Manipur-a mipui awm zat 53% an ni a, Imphal Valley-ah a tam zawk an khawsa. Tribal hnamte hi 40% niin, hill district-ah an cheng.