Meghalaya sorkar-in formalin hmuhna sangha chhui chiang dawn

Meghalaya sorkar hnuaia Fisheries Department chuan state pawn aṭanga sangha lak luh, formalin hmuhna chu chhui chiang turin fact-finding committee a din tih a puang.

Tun hnaia Food and Safety Department-in a endiknaah sangha lak luh an endik 42 zinga 30-ah formalin hmuh a ni a, hei vang hian ni 15 chhung state pawn aṭanga sangha lakluh leh hralh chhuah khap a ni.

Hemi hnu hian fisheries department chuan sangha khawitu leh zuartu pawl hrang hrang aiawhte chu meeting a neihpui a, sangha lak luha formalin hmuhna zir chiangtu tur din hi an rel a ni.

Minister AL Hek chuan hemi chungchang hi hmanhmawh taka hmalak a nih thu sawiin, committee report pawh department secretary hnenah ni hnih khat chhungin theh luh a ni ang, a ti. Thil dik lo a awm a nih chuan, a titute chungah an phu tawk hremna lekkawh a nih tur thu a sawi. Hei bakah hian state dang aṭanga sangha lak luhte chu endikna hmunpui siam a rawt bawk.

Hek chuan Meghalaya-ah aquaculture mission a hlawhtlin chhoh zel thu sawiin, state danga sangha an thawn chhuah chu 32% aṭangin 50% ah a pung tawh tih a sawi. Sangha khawi chu eizawnna tling a ni a, sorkar pawhin mipuite fuih zel a tum tih a sawi.