Tripura-ah Roman scrip hman phûtin kawng zawh

TIPRA Motha student wing, Tipra Indigenous Students Federation (TISF)-in Kokborok ṭawnga Roman script hman phuta kawng an zawhnaah police-te nen innawr buaiin, zirlai 20 chuangin hliam an tuar.

TISF hian Nilaini khan Agartala-ah nawrh hi an huaihawt a, Govenor House pana an kal chu police-te chuan lo dangin, zirlaite hnawh darh nan hian tiang bakah, tear gas leh water cannon te an hmang a ni.

Kokborok hi Tripura leilung fate'n ṭawng tualleng bera an hman niin, an state mipuite hmun thuma ṭhena hmun khat dawnin he ṭawng hi an hmang.

Tripura Tribal Areas Autonomous District Council (TTAADC) executive member, Runeil Debbarma chuan zirlaite hian boruak ṭha tak hnuaiah kawngzawh hi an huaihawt a, police-te chuan zirlaite dan tum hian kut an rawn hmang nghal mai niin a sawi a, zirlai hmeichhiate pawh an dim chuang lo a ni, a ti. Hliam zinga mi pali chu an na viau tih a sawi bawk.