Manipur khawpuia Union Minister in halsak

Manipur khawpui Imphal-ah Ningani zan khan mi sang chuang kal khawm chuan Union Minister RK Ranjan Singh-a in chu petrol bomb hmanga beiin an halsak. Hal a nih lai hian Union Minister leh a chhungte chu inah hian an awm lo.

Imphal khawpuiah hian curfew puan ni mah se, Kongba-

a Minister in bulah hian mipui tam tham tak an kal khawm thei tho a ni. He pawikhawihna thlen lai hian Minister inah security escorts personnel pakua, security guard panga leh guard dang pariat duty an awm. Pawikhawihna hi zan dar 11 vela thleng a ni.

Minister ina duty Escort Commander L Dineshwor Singh chuan, "Mipui an tam em avangin tih theih kan nei lo. Building hnung leh hma lam aṭangin petrol bomb an rawn vawm. Mipui kal khawmte kan veng zo lo a ni," tiin thil thlen dan a sawi.

Ningani zana thil thleng hi Manipur tualchhung buaina a chhuah hnua Minister in beih a nih vawi hnihna a ni a, thla hmasa pawh khan in hi beih ni tawhin, security-te'n mipui hnawh darh nan boruakah silai an hmet puak nghe nghe a ni.

Minister of state for external affairs and education RK Ranjan Singh hian thla hmasa khan Manipur-a Meitei leh Kuki hnam zinga an mithiamte chu state chhungah boruak ṭha a awm theih dan tur sawihoin, meeting a neihpui. Prime minister Narendra Modi pawh lehkha thawnin, Manipur-a buaina chawkchhuaktu politician-te tarlang a, demna thu sawi turin a lo ngen tawh bawk.

Union Minister chenna in beih a nih hma hian, Manipur-a hmeichhe minister awm chhun Nemcha Kigpen official quarters pawh beih a lo ni tawh bvawk. May 3-a tualchhung buaina a chhuah aṭang khan, MLA leh Minister 8-te chenna in chu beih a ni tawh a ni.

TMC-in Parliamentary Panel meeting neih duh

Trinamool Congress (TMC) chuan Manipur-a buaina thleng mek chungchang ngaihtuah turin Home Affairs hnuaia Parliament Standing Committee chu meting nei vat turin an duh.

TMC MP Derek O'Brien chuan Committee chairperson, BJP MP Brij Lal hnenah June 15 khan lehkha thawnin, thil awm dan chiang zawk hriat a ṭul tih a sawi. Buaina chhuakin a nghawngte dinhmun hriat chian a, Manipur-a buaina thleng mek chu a hmun a a nih dan dik tak hriat a ngai a ni, a ti.

O' Brien chuan Biak In tam tak tihchhiat a nih thu pawh tarlangin, "Hetiang hi thil thleng ngai lo a ni. Ei leh in man nasa takin a to a, ATM-ah thui tak tak in-line a ngai. Manipur-a tualchhung buaina chhuak hi

mipui chengte tan a him lo. Mi tam tak an thi tawh a, mi tam takin an in leh lo an chan tawh bawk. Shoot-at-sight order chhuak hian state chhung boruak a ti ralṭi a ni," tiin a sawi.

State chhung boruak dik tak leh buaina chhuak hi engtiang taka nasa nge a nih hriat a ṭul takzet tih sawiin, "Manipur-in harsatna a tawh mek hi sutkian dan kawng ngaihtuaha meeting neih vat a ngai a ni. Mi

pui aiawha thlan tlin kan nih angin, kan tih ngei ngei tur a ni," a ti.

Rahul-a'n PM Modi ngawih reng chhan a zawt

Congress party hruaitu, Rahul Gandhi chuan Manipur-a tualchhung buaina nasa tak a chhuah chungchangah Prime Minister Narendra Modi chu engmah ṭawng chhuak duh lo a, a ngawih reng chhan a zawt.

Manipur-ah hian Nilaini khan tualchhung buaina chhuak thar lehin, mi pakua in nunna an chan leh a ni.

Rahul Gandhi chuan, "BJP-in inhuatna politics a kalpuina avangin Manipur chu ni 40 chuang a buai tawh a, mi 100 chuangin nunna an chan tawh bawk. PM erawh chu he thil thlengah hian a la ngawi reng a, India a tibeidawng a ni. Manipur-a buaina chhuak tireh a, boruak muanawm a awm leh theihna turin all-party team tirh a ni tur a ni," a ti. Mi tam takin nunna an chan tawh hnu leh, buaina a chhuah chhunzawm reng laia Prime Minister a ngawi tlat thei chu a lungawi lo hle.

Rahul-a farnu, Priyanka Gandhi Vadra pawhin Manipur dinhmun chu a ṭha lo hle a, hetih laia sorkar laipuiin Manipur mipuite himna tur leh boruak muanawm a awm theihna atana hma a la chak tawk lo chu a lungchhiatthlak hle tih a sawi ve bawk.