Assam tuilian tuartu mi 29,000 tling dawn tawh

Assam-a district pathuma ruah sur nasa avanga tuilian tuar chu mi 29,000 dawn an tling tawh.

Assam State Disaster Management Authority (ASDMA)-in Ningania report a tihchhuahah, Dhemaji, Dibrugarh leh Lakhimpur district-ahte tuilianin a tihbuai chu mi 28,800 an tling tawh a ni. Lakhimpur district chu tuilian tuar nasa ber an ni a, harsatna tawk chu mi 23,500 an tling tawh. Dibrugarh chuan dawtin, tuilian tuartu hi mi 3,800 an chuang tawh a, Dhemahi-ah pawh mi 1,500 dawn an tling tawh bawk.

State sorkar chuan Lakhimpur district-ah tuilian tuarte tana chhawmdawlna semna tur, relief distribution centre pathum a hawng a, mahse, nimin thleng khan chhawmdawlna hi pek chhuah a la ni lo.

ASDMA chuan khaw 25 chu tuiin a chim tawh tih a sawi a, thlai chinna ram hectare 215.57-a zau pawh tuilian hian a chim tawh bawk. Biswanath, Bongaigaon, Dibrugarh, Jorhat, Lakhimpur, Morigaon, Sonitpur leh Udalguri district-ahte erosion nasa tak a thleng bawk.

Cachar leh Kamrup Metropolitan hmun ṭhenkhatah ruah sur nasa vangin lei a min a, Lakhimpur, Goalpara, Biswanath, Dhemaji, Baksa, Dima Hasao leh Karimganj district-ah te kawng, lei leh thil dangte a chhe bawk a ni.

Guwahati-a Regional Meteorological Centre (RMC) chuan Nilaini khan northeast hmun hrang hrangah ni nga chhung ruah nasa tak a sur dawn tih a lo sawi lawk tawh a ni. RMC chuan ni thum chhung 'Orange Alert' leh chumi zawh ni hnih chhung 'Yellow Alert' a ti chhuak a ni. Yellow alert hi chhiatna thleng thei lakah inpuahchah tur tihna a ni a, Orange Alert hi chanchin lo ngaihchan tur tihna a ni.