Manipur CM hluiin Manipur chungchanga PM ngawih tlat chhan a zawt

Manipur Chief Minister hlui Okram Ibobi Singh chuan kar liam ta Zirtawpni khan AICC, New Delhi-ah press conference neiin, ni 40 chuang Manipur-ah tualchhung buaina a chhuah hnuah pawh Prime Minister Narendra Modi a la ngawi tlat chu demawm a tih thu a sawi. Manipur state hi India ramah chhiar a ni ve lo em ni? tiin Modi-a chu a zawt.

Manipur-a political party 10 hotute chu Prime Minister hmuh tumin kar khat chhung Delhi-ah an cham tawh a, nimin thleng khan appointment-an la hmu lo a ni.

Okram Ibobi Singh chuan,"Manipur hi India ramah a tel ve lo em ni? India-ah a tel a nih chuan engati nge Prime Minister hian min hmuh a duh loh? PM hi ram pawna a zin chhuah hmain hmuh ngei kan in beisei," tiin a sawi. Manipur boruak a ṭhat lohzia sawiin Singh chuan, mi sing hnih chuang - a tam zawk naupang leh hmeichhia - relief camp-ah an awm a, a aia tam hmun hrang hrangah awmna tur mumal nei loin an awm bawk tih a sawi.

PMO aṭangin chhanna la dawng lo

Prime Minister hmuh tuma Delhi-a cham mek zingah hian Janata Dal (United), the Communist Party of India and the CPI (Marxist), Trinamool Congress, Aam Aadmi Party, All India Forward Bloc, Shiv Sena (UBT), Nationalist Congress Party, leh Revolutionary Socialist Party hotute an tel a, kar liam ta Zirtawpni khan Delhi-a Congress headquarter-ah press conference an nei a ni.

June 10 khan Prime Minister hmuh dilna hi Prime Minisiter office an email bakah, June 12-ah office-ah hian kalin, kut ngeiin an dilna hi an theh lut leh bawk a, mahse tun thlengin chhanna an la dawng lo, tih an sawi.

Manipur ki Baat

Manipur tualchhung buaina thleng mek chu June 18, 2001-a Manipur-a thil thleng nen tehkhinin, Congress General Secretary Jairam Ramesh chuan khatih hunlaia sorkarna chelhtu, BJP hruaitu Atal Bihari Vajpayee chuan a ngaihsak zawk tih a sawi.

Jairam Ramesh chuan, "Kum 2001-a buaina chhuah ṭum khan, buaina chhuah aṭanga ni 6-na, June 24, 2001-ah Vajpayee chuan state chhunga party hotute meeting a neihpui. July 8-ah hetih laia Home Minister L.K. Advani pawhin party hotute a hmu bawk. Party hotute nen an inhmuh ṭum hnihah hian Vajpayee chuan, Manipur-a boruak ṭha a awm leh theih nan thuneitute nena thawhho leh rilru fim put a ṭulzia a sawi ve ve a ni," a ti.

Ramesh chuan, "Vawiinah hian, party 10 hotute chuan PM Modi hmuh tumin kan nghak reng a, mahse hmuh theih a ni lo," a ti. Home Minister Amit Shah-an Manipur a tlawh hnuah pawh hmasawnna engmah a awm lo chu a lungawithlak loh tih sawiin, Congress hruaitu chuan, Modi chu Vajpayee tihdan entawna party hotute hmu turin a ngen. Prime Minister programme lar tak "Mann ki Baat" aia "Manipur ki Baat" a pawimawh thu a sawi. Manipur chu RSS zirtirna leh BJP politics vanga buai a ni, a ti bawk.