North Sikkim-a khualzin tangkhangte hruai chhuak

Sikkim-a ruahsur leh leimin avang nasa tak avanga khualzin tangkhangte chu hruai chhuah an nih thu North Sikkim District Collector (DC) Hem Kumar Chettri chuan a sawi.

DC Chettri chuan khaw chin mumal lo avang leh leiminin kawng a tihchhiatte siam ṭhat hna thawh mek a nih avangin, North Sikkim district tlawh phalna pek chhuah a ni rih dawn lo tih a sawi bawk.

Ni thum chhung ruah nasa taka a sur chhunzawm reng avanga zin vei vak tangkhangte hruai chhuah hna chu Inrinni khan zawh fel a nih thu sawiin, zin vei vak tangkhang zawng zawngte leh Namchi College-a zirlai 60-te chu sorkar-in motor a ngaihtuahsak hmangin anmahni khaw lam ṭheuh an pan mek tih a sawi.

Hlawhtling taka zin vei vakte hruai chhhuah hna thawktu BRO, GREF, ITBP, Army leh district official-te chungah lawm thu sawiin Chettri chuan, "Mangan Chungthang kawng siam ṭhat hna thawh mek a nih avangin zin veivakte hnenah North Sikkim tlawh phalna pek rih lo kan rel. Kan ngaihpawimawh hmasak chu ruah sur nasa leh leiminin kawng a tihchhiatte siam ṭhat a ni a, kawng a tlang leh veleh zin vei vakte tlawh phal leh nghal a ni ang," a ti.