AAP-in Manipur CM Biren Singh an dem

Aam Aadmi Party (AAP) chuan sorkar laipui leh Manipur Chief Minister N. Biren Singh chu Manipur-a tharum thawhna thleng an tihtawp theih loh avangin na takin an sawisel.

AAP thupuangtu Priyanka Kakkar chuan,"Hmeichhe minister Nencha Kipgen chenna in halsak a ni a, nimin lawkah union minister Rajkumar Ranjan Singh in hal a ni bawk. Hei hian state sorkar hlawhchhamzia a tilang chiang hle a ni," tiin Inrinni liam ta khan a sawi.

Kakkar chuan Prime Minister Narendra Modi pawh sawiselin, "Engati nge hmalakna engmah a awm loh?" tiin a zawt. Manipur-ah Ak-47 leh ralthuam ṭha tak tak tawlhluh a nih thu sawiin, state sorkar chuan hei pawh hi a veng zo lo a ni, a ti.

"Manipur CM hi bang rawh se. Chhungkaw sing nga chuang raltlan an awm tawh a, sorkarin chhawmdawlna pe rawh se. PM Modi hian ramchhung mipui hnenah Manipur-a tualchhung buaina chhuah chhan hi sawi fiah bawk rawh se," tiin Kakkar chuan a sawi.

PM hi US aiin Manipur-ah a kal zawk tur a ni : Uddhav

Shiv Sena (UBT) President Uddhav Thackeray chuan Manipur buaina thleng mek chungchangah Prime Minister Narendra Modi leh union Home Minister Amit Shah-te chu an takin a bei bawk.

Pathiannia Mumbai-a Sena (UBT) convention-a thu a sawiah Thackeray chuan, PM Modi chu US-a 'paid audience' te hmaa thu sawi tura kal loin, Manipur-ah kal zawk a, buaina thleng mekte titawp tura hma la zawk tur a ni, a ti. "Russia leh Ukraine indona titawp tura i beih thute i sawi a, i thusawite a dik ngei tih tichiang turin Manipur mipuite rawn thlamuan phawt rawh. Manipur-ah kal la, mipuite chuan i thusawi an ngaithla em tih en phawt rawh," tiin US-a PM Modi zin tur chu na takin a bei.

Manipur-ah hian thla khat chuang zet buaina chhuak tawhin, mi 100 chuangin nunna an chan tawh a, mi sing tel chu hmun him lamah an tlanchhe tawh bawk. Hetih lai hian PM Modi chu Manipur chungchangah a la ngawi reng a, hei vang hian eptu party hrang hrangte beih pawh a tawk nasa tawh hle.

BJP hruaituin President's rule puan phut

BJP hruaitu, Subramanian Swamy pawhin Manipur buaina thleng mekah sorkar laipui a sawisel a, President's rule puang turin a phut.

Subramanian Swamy chuan a Twitter-ah Manipur-a BJP sorkar chu tihtawp a, Article 356 hnuaiah central rule hnuaiah dah a hun tawh a ni,a ti. Hemi rual hian union Home Minister Amit Shah pawh home ministry chang tlak loa ngaiin, sports ministry-a sawn turin sorkar laipui a ngen zui bawk.

June 21-ah school hawng ṭan dawn

Tualchhung buaina chhuah vanga hun rei tak zirna inte khar a nih hnuah, Manipur sorkar chuan June 21 aṭangin school hawn ṭan a ni dawn tih a sawi.

Directorate of School Education chuan Inrinni khan thuchhuah siamin, June 21 aṭanga school hawn a nih theihna turin, zonal education officer zawng zawng chu a ṭul anga hma la turin a hriattir a ni.

Buaina chhuak hi zirlaite'n an tuar hle a, zirlai sang tel chu hmun him lamah an la tlanchhe mek a ni. Hei vang hian sorkar laipui pawhin zirlaite harsatna tawhte chu ngaihtuah a, an zirna lamin a tawrh zel tur veng tura a ṭul anga hma la turin state sorkar chu a lo hriattir tawh bawk.

National Medical Council (NMC) chuan Churachandpur Medical College (CMc)-a first-year MBBS zirlaite chu Imphal leh Churachandpur-ah an remchanna zawkah offline class kal a lo phalsak tawh bawk a ni.