Assam Women's Congress-in CM Sarma chhui chian an phut

Assam Pradesh Mahila Congress chuan Chief Minister Himanta Biswa Sarma chu Manipur-a inlak hran duhtu pawl thawhpuiah puhin, hemi chungchang hi chhui chian an phut.

Assam-a eptu pawl lian ber, Congress hmeichhe wing President, Mira Borthakur Goswami chuan kar liam ta Inrinni khan hemi chungchangah hian state police director general hnenah memorandum a theh lut. Women's Congress chuan an memorandum theh luhah, Kuki militant pawl leader-in Union Home Minister hnenah lehkha thawnin, an pawlin kum 2018 Manipur inthlanah BJP an puih thu a ziak tiin an sawi. Hetiang lehkha thawn a ni leh, hemi chungchang sawi fiahna sorkarin engmah a siam lo hi thil mak tak a ni, an ti bawk.

Kar liam ta Ningani khan Congress, CPI, CPI(M), AAP leh TMC-te telna, eptu pawl 12-te chuan Sarma chu Kuki militant pawl nena inkungkaihna a neih avangin, National Security Act hnuaiah man an lo phut tawh bawk. Eptu pawlte hian CM Sarma-in militant pawl hotu ṭhenkhatte "close-door" meeting a neihpui chu an dem thu sawiin, sit-in protest an lo huaihawt tawh a ni.

Assam Chief Minister leh BJP hotute chuan hemi chungchangah hian ngawih chuhin, central lama an hotute kutah an dah tih an sawi.