AP-ah hri kai 2,000 chuang awm tawh

Arunachal Pradesh-ah Covid-19 kai hmuh chhuah 2,000 an chuang tawh. Inrinni khan hri kai hi 101 hmuh chhuah belh an ni a, hengte nen hian hri kai hmuh tawh hi 2,049 an tling ta tih state surveillance officer Dr L Jampa chuan a sawi. 

Dr Jampa chuan hri kai hmuh thar zingah hian security force mi 46 an tel a, health worker pakhat a awm bawk tih a sawi. Hri kai hmuh tawh zinga 1,326 chu enkawl dam an ni tawh a, mi pathumin an thihpui tawh thung a ni. 

August 1 aṭang khan hri kai enkawl dam an pung chak a, recovery rate pawhin hma a sawn zel tih Jampa chuan a sawi. August chhung bika hri kai hmuh thar hi 567 awmin, hemi chhung vek hian enkawl dam 542 an awm bawk. Security force zingah Covid-19 kai hmuh chhuah hi 230 an awm tling tawh bawk.