Manipur sorkarin in leh lo chânte tan in 4000 sa dawn

Manipur Chief Minister, N Biren Singh chuan tualchhung buaina chhuak avanga in leh lo tlanchhiatsante tan state sorkarin in 3000 aṭanga 4000 inkar a sa dawn tih Thawhṭanni khan a sawi.

Chief Minister hian Thawhṭannia relief camp a tlawh kualnaah, thla hnih chhungin in sak hi zawh fel a nih tur thu a sawi. Sorkarin in a sak tur hi pre-fabricated a ni a, hmun dangah a structure-te chu siam a ni ang a, in awmna tur hmunah hian rem khawm a ni ang.

CM Singh chuan, "Buaina chhuak tuartu relief camp-a awmte tan state sorkar chuan In a sa dawn a, hei hi anmahni chenna hmuna an let leh theih hmaa an lo khawsak lailawkna tur a ni," tiin a sawi.

In hi 3000 aṭanga 4000 inkar sak a ni dawn a, in sakna tur hmanruate pawh chah a ni tawh tih Singh chuan a sawi. Sorkar chuan in sakna tur hmun a zawng mek a, relief camp-a awmte chu thla hnih chhungin sawn chhuah hman a tum tih Chief Minister hian a tarlang.

Thla khat chuang liam taa Meitei leh Kuki hnam inkara buaina chhuak avang hian mi 100 chuangin nunna an chân tawh a, in tam tak hal a ni tawh bawk. State sorkar chuan district 11-ah curfew puangin, internet a titawp bawk.

Internet service pe turin Manipur sorkar hriattir

Manipur High Court chuan tualchhung buaina chhuak vanga hun rei tak internet service tihtawp a nih hnuah, state sorkar chu internet service pe chhuak tawh turin a hriattir.

Court chuan hnathawhna atan internet hi a pawimawh tih sawiin, a bikin admission tih ngai zirlaite tan a ṭul hle a ni, a ti.

Internet service pe tur chhuak tawh tur hian court chuan kar liam ta Zirtawpni khan state sorkar chu a hriattir tawh a, mahse, hriattirna a pek chungchang hi nimin khan sawi chhuah a ni chauh thung.

High Court bench chuan telecom service provider-te chu state sorkarin buaina a chhuah leh zel a hlauhthawnna hrethiam a, social media website-te block chunga internet service pek chhuah theih dan hi sawi fiahna theh lut turin a hrilh bawk. Hemi chungchang hi June 23 hian ngaihtuah leh a ni ang.