Meghalaya-ah enkawl mek 594 awm

Meghalaya state-a hri kai hmuh tawh chu 1,023 tling tawhin, an zinga 423 chu enkawl dam an ni tawh a, hri kai enkawl mek hi 594 an la awm. 

Chief minister Conrad Sangma chuan an state-a hri kai mek, mi 594 zingah 263 chu BSF leh Armed Forces danga mite an nih thu a sawi. Inrinni liam ta khan hri kai hmuh thar hi mi 17 an awm a ni. 

East Khasi Hills district chhunga hri kai hmuh tawh zingah health worker- doctor, nurse leh health department staff dang 34 an tel tawh.  Director of Health Services, Aman War chuan health worker-te hian hri kai an enkawlna aṭangin an kai ve tih a sawi. 

Hospital tinte chu fimkhur tura chah an ni a, hospital quarantine centre-a awm mek health worker-te chu pawn lama an chhuah a rem loh thu a sawi. Health department hian hripui leng mek dona kawnga thawk turin doctor 50, nurse 200 leh laboratory technician 100 chuang a ruat a ni. Sample 40,700 test a  ni tawh bawk.