Assam tuilian tuartu mi 30,000 an tling tawh

Assam-a tuilian chuan ziaawm lam a la pan thei lo a, nimin thleng khan state chhung district 10-a tuilian tuartu hi mi 30,000 an tling tawh a ni.

India Meteorological Department (IMD) chuan Thawhṭanni khan 'Red Alert' a ti chhuak a, district hrang hrangah ni nga chhungin ruah nasa takin a sur dawn tih a sawi.

Assam State Disaster Management Authority (ASDMA) in daily flood report-a tihchhuahah, Chirang, Darrang, Dhemaji, Dhubri, Dibrugarh, Kokrajhar, Lakhimpur, Nalbari, Sonitpur leh Udalguri district-ah tuilian tuartu mi 30,700 an tling tawh. Lakhimpur district hian tuilian hi tuar nasa berin, mi 22,000-in harsatna an tawk a, Dibrugarh in dawtin, tuilian tuartu mi 3,800 an awm. Kokrajhar district-ah pawh tuilian tuartu hi mi 1,800 dawn an ni tawh bawk.

State sorkar chuan district pasarihah relief distribution centre 25 a hawng a, mahse, chawmdawlna pek chhuah a la ni lo.

ASDMA tarlan danin tun dinhmunah khaw 444 chu tuiin a chim tawh a, thlai chinna ram hectare 4,741.23-a zau pawh tuilian hian a tichhe tawh bawk. Biswanath, Dhubri, Dibrugarh, Golaghat, Kamrup, Karimganj, Kokrajhar, Lakhimpur, Majuli, Morigaon, Nagaon, Nalbari, Sivasagar, Sonitpur, South Salmara, Tamulpur leh Udalguri-ahte erosion nasa tak a thleng bawk.

Dima Hasao, Kamrup Metropolitan leh Karimganj hmunahte ruah a sur nasat avangin lei a min a, Sonitpur, Nagaon, Nalbari, Baksa, Chirang, Darrang, Dhemaji, Goalpara, Golaghat, Kamrup, Kokrajhar, Lakhimpur, Dibrugarh, Karimganj leh Udalguri hmunahte tuilian hian kawng, lei leh thil dangte a tichhe bawk. Brahmaputra tuipuia luang lut Kampur-a Kopili lui chuan hlauhawm chin a pel tawh a ni.