Tripura CM-in 'Plastic Free Tripura' a tlangzarh

Tripura Chief Minister Dr. Manik Saha chuan "Melaghar Rath Yatra Mela & Utsav" hawnna inkhawmah 'Plastic Free Tripura' hmalakna kalpui a nih tur thu a puang.

State-in thil hlu a neihte vawn him a ṭulzia sawiin, Chief Minister chuan Tripura lal in 'Neer Mahal' enkawl uluk turin mipuite a chah. Infosys Foundation chairperson Sudha Murthy-in Neer Mahal chhehvela bawlhhlawh an paih nasat thu a hrilh hnuah CM hian a bawhzui nghal thu a sawi.

Tripura sorkar chuan 'Nesha Mukta Tripura' campaign hlawhtling taka a lo kalpui tawh chu entawnin 'Plastic Free Tripura' movement kalpui a tum a ni.

'Plastic Free Tripura' hmang hian Tripura chu plastic hman lohna state-a siam tum a ni dawn a, plastic thlaktu atan ṭawihthei chi hmante sawi mawiin, plastic-in environment a tihchhiat dante zirtirna an pe ṭhin ang. State sorkar chuan he campaign kaltlang hian, Tripura mawinate khawih chhiat a nih lohna tur leh, chenna nuam leh thianghlim siam turin hmalak a tum a ni.