Tripura-ah Covid-19 vangin BSF sipai pahnih thi

Tripura-ah coronavirus vanga thi an pun belh zel a, kar liam ta Inrinni khan  Border Security Force (BSF) sipai pahnih chu hripui vangin an thi ve leh. An state-ah Covid-19 vanga thi mi 40 an tling tawh a ni. 

Hripui vanga thi BSF sipai pahnihte hi Agartala Government Medical College-a enkawl, kum 52 leh 51 mi an ni. 

Tripura-a BSF sipai zingah kai hmuh chhuah an awm belh zel a, nimin thleng khan BSF sipai zingah Covid-19 hmuh tawh hi 720 an tling tawh a ni. State puma hri kai hmuh tawh hi 6,164 awm tawhin, an zinga 3,279 chu rapid antigen testing kit hmanga enfiah niin 2,738 chu RT-PCR hmanga test an ni. Hri kai zinga tam zawk chu enkawl dam an ni tawh a, enkawl mek mi  1,876 an la awm. State chhunga test neih aṭanga hri kai  hmuh chhuah zat, positivity rate hi 3.04% a ni a, hri kai dam tawh recovery rate hi 69.60% niin, hri thihpui zat mortality rate hi 0.67% a ni.