Manipur-a school hawn hun tur sawn hla leh

Manipur sorkar chuan tualchhung buaina avanga hun rei tak school khar a nih hnuah, June 21 aṭanga school hawn ṭan tawh tura thuchhuah a siam chu buaina a la reh loh avangin a sawn hla leh.

Director of education (schools) L Nandakumar Singh chuan Thawhlehni khan thuchhuah siam thar lehin, department of school education hnuaia zonal education officer zawng zawngte hnenah, state chhunga school hawn tura tih chu July 1, 2023 thleng sut leh a nih thu a hriattir a ni.

May 3-a Meitei leh tribal-te inkara buaina a chhuah hnuah, Manipur sorkar chuan state chhunga zirna in hrang hrang, sorkar leh private school-te chu May 4 aṭang khan a khar a ni. Hun rei tak zirna chawlhsan a nih hnuah, kar liam ta khan sorkar chuan June 21 aṭangin Class 8 chin chu class pangngaia kal chhunzawm turin hriattirna a tichhuak. Mahse hriattrina a tihchhuah hnuah tualchhungah buaina a la chhuah thar reng vangin, school hawn hun tur pawh a sawn hla leh ta a ni.

Official-te chuan buaina chhuak vanga hmun danga tlanchhia zingah zirlai 6,000 vel an awm thu an sawi. Heng zirlaite hi an awmna hmunah lehkha zirna hmanrua leh uniform-te pek vek an ni dawn tih education minister Bashanta Singh chuan a sawi. Relief camp hrang hranga zirlai awmte coaching class pe turin volunteer teacher-te dah an ni dawn tih a sawi bawk.