AP sorkar leh Indian Army-in Tawang Marathon hawng

Arunchal Pradesh Chief Minister Pema Khandu chuan Thawhlehni khan Indian Army aiawh nen Tawang Marathon khuhhawnna an nei.

October 1-a neih tur marathon hi khawvel hmun hrang hrang aṭanga tel tura mi hipna atana buatsaih a ni tih official thuchhuah chuan a tarlang. He marathon hi kumin chhunga event an huaihawt lian ber zinga mi a ni dawn a, marathon tlan ṭhinte leh hetiang lama tui mite tan hriat reng tlak a ni dawn tih a sawi.

Tawang Marathon hi Arunachal Pradesh sorkar leh Eastern Command of Indian Army-te ṭangkawpin an buatsaih a ni a, inpumkhatna leh infiamna leh hriselna lama hmasawnna a awm theihna tura an thawh dunna a ni.

Tawang Marathon-ah hian category pali a awm dawn a, fitness level hrang hrangte tana tel theih tura duan a ni. Marathon-a tlan turte hian heng category pali; Prestigious Marathon (42.195 KM), Half Marathon (21.0975 KM), 10 km race emaw, 5 km race emaw zingah hian an duh ber an thlang thei ang.