Myanmar raltlante sorkar hmun siamah awm duh lo : Manipur Panel

Munipur state-a dan loa lo lutte zawng chhuak tura din, Manipur cabinet sub-committee chuan Myanmar aṭanga dan loa lut mi 2000 chuangte chu khaw chhungah awmin, sorkarin awmna hmun tur a siamah an awm duh lo tih a tarlang.

Hetih lai hian Kuki pawlte chuan Manipur sorkar chu dan loa Manipur lutte zawn chhuah chu chhuanlamah hmangin, India khua leh tuite tibuaiah an puh. Kuki pawlte chuan Manipur tlangramah hun rei tak an khawsak tawh thu leh Anglo-Kuki War indonaah pawh British-ho an lo beih tawh thu an sawi a, India khua leh tui dik tak Kuki hnamte chu dan loa ram chhunga pem (illegal immigrant) anga chhuah tumah Chief Minister, N Biren Singh kaihhruai BJP sorkar chu an puh a ni.

Tribal Affairs and Hill Development Minister, Letpao Haokip kaihhruai cabinet sub-committee chuan, kumin March 29 leh April 1 khan Senapati district-a Gamphazol leh Churachandpur district-a Singhat hmuna awm raltlante an tlawh thu leh, chawmdawlna pek leh an awmna hmun tur siamsak chungchangte an sawipui tih an tarlang. Cabinet sub-committee-ah hian minister - Awangbow Newmai leh Thounaojam Basanta pawh an tel.

Cabinet sub-committee chuan Arpil 24 khan report theh lutin, hmun 41-ah dan loa lo lut mi 2,187 an hmuh chhuah thu an tarlang. Dan loa lutte zawn chhuah thawh khatnaah pawh mi tam tak hmuh chhuah an ni a, manganna tham a ni, a ti.

"Dan loa lutte'n khua an din chu phal loh a nih thu te, sorkarin an awmna tur shelter home a saksak tur thu pawh hrilh an ni bawk. Illegal immigrant-te chuan hei hi an duh lo hle a, tun hnaia buaina chhuah chhan pakhat pawh a ni," tiin report chuan a tarlang. Cabinet sub-committee chuan field visit an neihnaa document pawimawh an lak khawm zawng zawngte chu state sorkar hnenah an theh lut vek a ni.

"Manipur sorkarin ruihhlo dona kawnga a hmalakna hi poppy chingtute leh Myanmar mi ruihhlo zuartute chuan an chhiatpui hle a,tun hnaia Manipur-a buaina chhuak pawh hi poppy chingtute leh Myanmar mi ruihhlo zuartute tih punlun a ni," tiin report chuan a tarlang.