Sonia-i'n inremna siam thuai turin Manipur mipuite ngen

Congress Parliamentary Party chairperson Sonia Gandhi chuan Nilaini khan Manipur-ah boruak ralmuang awm thuai tura a duh thu sawiin, state chhunga mipui tam takte nun tibuaitu, tharum thawhna duhawm lo tak thleng hian ram pum a hliam tih a sawi.

Congress-in social media-a video message a tihchhuahah, Sonia Gandhi chuan kum tam tak chhunga an din, mahni in leh lote tlanchhiatsan a ngai ta chu pawi a tih thu sawiin, "Kan unau inrem taka khawsa ho ṭhinte inkarah inhuatna a thleng ta hi a rilru natthlak hle a ni,"a ti.

Gandhi chuan Manipur history enin, Manipur-ah hian hnam, sakhua leh background hrang hrangte inngeih takin an khawsa ho thei tih a chiang hle tih sawiin, "In unauna vawng nung turin inrintawnna thuk tak leh ṭhat inchhuah tawnna a ngai a, thil dik lo pakhat hian inhuatna leh inṭhendarhna a thlen thei a ni," tiin a sawi.

Sonia Gandhi chuan, "Vawiinah hian kawng peng ṭhuam pawimawh takah kan awm. Vawiina kan duhthlanna hian kan tu leh fate hmakhua a hril dawn. Manipur mipui zawng zawng, a bik takin ka unaunu huaisen tak takte, he ram mawi takah hian remna leh muanna a awm leh theih nana hma la turin ka ngen a ni," tia sawiin, nu a nih angin an tuarnate chu a ṭawmpui tih a sawi.

Congress chuan BJP chu Manipur tualchhung buaina chhuak chungchangah inṭhendarhna politics khelah puhin, sorkar laipui leh state sorkar chu dan leh hrai kengkawh zo loah an puh a ni.

Prime Minister-in a tih tur a ti lo

Congress party chuan Manipur-a tualchhung buaina chhuak hian ni 50 a awh tawh tih sawiin, Prime Minister Narendra Modi chu boruak siam ṭhat kawnga hlawhchham derah a puh. Manipur-in hun harsa tak a tawh mek chu ngaihsak duh lo luiah a puh bawk.

Congress General Secretary Jairam Ramesh chuan BJP kaihhruai sorkar chu Manipur chungchanga hnathawk loa ngawi rengah puhin, "Manipur-ah ni 50 chung boruak ṭha lo tak a thlen mek lai hian, Prime Minister chu USA-ah a zin daih tih hi i theihnghilh lo ang u. Thil thleng tam tak chungchanga thuchah (gyann) sawi ṭhin Prime Minister hian Manipur thil thleng chungchangah hian engmah a la ṭawng chhuak lo a, political party aiawhte pawh hmu duh loin, Manipur-a thil thleng hi ngaihsak ang pawhin a awm duh lo," tiin a sawi. Manipur a ngaihsak duh lo hian Prime Minister a nih anga a tih turte a hlamchhiah tih sawiin, Modi khawsakzia chu mak a tih thu leh hriatthiam har a tih thu a sawi.

Manipur Congress spokesperson Ningombam Bupenda Meitei pawhin, "Manipur buaina hian eng tianga rei nge a awh dawn? Thla nge kum nge kum 10 chuang?" tia zawtin, Manipur mipuite hian Prime Minister hnen aṭanga chhanna dawn hi an phu tih a sawi. Manipur-ah thla hnih dawn internet tihtawp a nih avangin mipuiin harsatna nasa tak an tawh thu leh hnathawktu tam tak internet hman duh vangin Manipur an chhuahsan tawh thu a sawi bawk

Eptu pawl 10 hruaitute chu June 10 aṭang khan PM hmuh tumin Delhi khawpuiah an cham tawh a, mahse an la hmu thei lo. Prime Minister Office (PMO)-ah memorandum pawh an theh lut tawh.

Congress hruaitu Shashi Tharoor chuan, "Manipur-a tharum thawhna leh chhiatna nasa tak thlenna hi ni 50 a ni tawh a, sorkarin ngawih a chuh tlat leh engmah a ti lo hi hriatthiam har tak a ni. Ni 50 chhungin hei ai ngaihpawimawh tur lian zawk a awm a mi? Khawiah nge sorkar chak tak min tiam chu an awm?" tiin a zawt. Manipur-ah internet tihtawp a nih chhan zawtin, internet tihtawp hian tharum thawhna a ti reh lo a, mipuiah harsatna a siam ringawt zawk a ni, a ti. "Buaina chhuah apianga internet tihtawp a ni leh ringawt ṭhin hi sim a ṭul. India hian khawvel puma internet titawp zing ber leh rei ber record ṭha lo tak kan nei mek a ni," a ti.