Assam-ah tuilian tuartu mi nuai 1.2 tling tawh

Assam-ah Nilaini khan tui a lian zual a, tuilian tuartu hi mi nuai 1 an tling tawh.

Assam State Disaster Management Authority (ASDMA) in Nilaini tlaia bulletin a tih chhuahah, mi 1,19,830-in tuilian hi an tuar mek tih an tarlang a, an zingah hian hmeichhia 48,967 leh naupang 17,652 an tel. NDRF leh SDRF-te'n chhahchhuah hna thawkin, disaster management agency-te lawng hmangin mi 1,280 chu thiar chhuah an ni tawh. District hrang hrangah thlai chhinna ram hectare 1,0591.85-a zau chu tuiin a chim tawh a ni.

Thawhlehni thleng khan upper Assam-a Lakhimpur district chu tuilian tuar nasa ber an la ni zel a, Nilaini aṭang khan lower leh west Assam district lamah tuilian hi a nasa zual a ni. Baksa district-a Puthimari lui a lian a, lower Assam-a lui Pagladiya (Nalbari), Sankosh (Dhubri) leh Beki (Barpeta)-ahte tui a lian nasa hle bawk.

ASDMA-in report a tihchhuah hnuhnung berah chuan Nalbari district-ah tuilian tuartu mi 44,707 an tling tawh a, Baksa-in dawtin mi 26,571 an tling a, Lakhimpur-ah mi 25,000 chuangin tuilian hi an tuar tawh. State chhunga thingtlang khaw 780-in tuilian hi an tuar mek a ni.

District leh sub-district pariatah relief camp 14 siam niin, mi 2,019 an awm mek. Relief distribution centre 17 hawn belh a ni bawk.