Manipur-in RBI riot provision hmang dawn

Manipur sorkar chuan hun rei tak tualchhung buaina an tuar tawh avangin, sumdawnna leh mipuite chhamdawlna turin Reserve Bank of India (RBI) riot provision chu hman a ni dawn tih a puang.

State sorkar chuan tualchhung buaina thleng mek chu state pumin a tuar a, state economy leh mipui tam zawk eizawnna a khawih buai hle tawh tih a sawi. Hei vang hian hman zen zen loh, RBI riot provision hi a hmang dawn a ni.

RBI riot provision hi economy che theiloa a awm hunah chauh hman tur a ni. He provision hman a nih chhung hian loan puktute chu loan rulh a awl lailawk thei dawn a ni. He provision hi khuarel chhiatnaah chauh hman ṭhin a ni a, dan leh hrai kaihhnawih buainaah tun hma lamah chuan hman a ni ngai lo.

Manipur-ah hian May 3 aṭanga Kuki-Zo leh Meitei inkara tualchhung buaina chhuak chu a la reh lo a, buaina chhuak vang hian mi 100 chuangin nunna chan tawhin, mi 50,000 chuang awmna mumal nei loin an awm mek bawk. Buaina chhuah aṭang hian ni 50 ral tawhin, state chhungah hian curfew puan a la ni reng a, internet pawh tihtawp a la ni bawk.

Nilaini aṭang khan silaia inkahna hmun thumah leh, motor bomb a awm thu report a awm leh tawh a ni. Manipur khawpui Imphal West-a N.Boljang hmunah pawh inkahna thlengin sipai pahnihin hliam an tuar tih Army lamin an sawi.

Manipur Chief Secretary Vineet Joshi chuan June 21 khan thuchhuah siamin, state chhung boruak chu sumdawnna hmun leh mimal in tam takin kawng hrang hrangin a tuar tih Deputy Commissioner hrang hrang hnen aṭangin report a dawn thu a sawi. "Hei vang hian, loan puktute tan loan rulh ngaihna a awm lo. SLBC (State Level Bankers’ Committee)-te chu loan puktute tan chhawmdawlna siam tura ngen a ni," tiin a tarlang.

Order tihchhuahah hian May 3-a AII-Tribal Students Union Manipur-in Tribal Solidarity March an neih aṭanga lo irhchhuak, tualchhung buaina hian he thila inhnamhnawih hnamte chauh nilo state pum a nghawng tih tarlan a ni a, tualchhung buaina thlen thulha inkaihhruaina, 'Reserve Bank of India (Relief Measures by Banks in Areas Affected by Natural Calamaties) Directions, 2018' chapter No.7 chu Manipur-ah hian a hman theih a ni, tih a sawi.