Assam tuilianin ziaawm lam la pan lo

Assam-a ruah sur nasa avanga tuilian chuan ziaawm lam a la pan thei lo a, tuilian tuartu hi mi nuai nga dawn an tling tawh. Tuilianin chhiatna a thlenah mi pakhat a thi tawh a ni.

Brahmaputra lui bakah, state chhunga lui tam tak chuan hlauhawm chhinchhiahna an pel tawh bawk. Indian Meteorological Department (IMD) chuan state chhungah ruah a sur chhunzawm dawn nia a sawi avangin, tuilian hi a la ziaawm mai rih dawn lo niin a lang.

Tuiin an chenna in a chim avangin mi tam tak chu hmun him lamah sawn chhuah an ni a, district 16-ah tuilian hi an tuar mek a ni. District pasarihah relief camp 83 siam a ni tawh a, heng hmunah hian mi 14,000 an khawsa mek. Relief distribution centre 79 pawh siam a ni tawh bawk.

Tuilian tuarte chhanchhuah leh chhawmdawl hna hi paramilitary force, NDRF, SDRF, Fire and Emergy Services (F&ES), civil administration, NGO leh tualchhung mite'n an thawk mek a ni.